1043: Loch a’ Ghartain (1)
Litir sheachdaineach do luchd-ionnsachaidh le clàr-fuaime, tar-sgrìobhadh is mìneachadh. A weekly letter to Gaelic learners with audio, transcription and explanation.
Tha an litir ag obrachadh leis an fhaclair. Tagh an taba ‘teacsa Gàidhlig’ agus tagh facal sam bith san teacsa agus fosglaidh am faclair ann an taba ùr agus bidh mìneachadh den fhacal ann. The letter is integrated with the dictionary. Select the tab ‘Gaelic text’ and choose any word and the dictionary will open and you will see the English explanation of the Gaelic word.
Loch a’ Ghartain (1)
An robh sibh riamh aig Loch a’ Ghartain ann an Srath Spè? Tha e faisg air Coit Ghartain, far am biodh daoine a’ dol a-null is a-nall thar Uisge Spè ann an coit – bàta beag – anns an t-seann aimsir. Tha Loch a’ Ghartain ainmeil an-diugh oir ʼs e fear de na h-àiteachan as fheàrr ann an Alba airson an iolair-uisge fhaicinn. Tha e cuideachd gu math brèagha, le coille-ghiuthais ceithir-timcheall air. Tha cothrom an sin an capall-coille fhaicinn.
Bhathar ag ràdh aig aon àm gun robh creutair os-nàdarrach a’ fuireach anns na coilltean timcheall Loch a’ Ghartain. ʼS e am Bodach a chanadh muinntir an àite ris. Chan eil fhios a’m am faiceadh daoine càil, ach chluinneadh iad am Bodach a’ glaodhaich is a’ caoidh. Bha iad ag ràdh gun robh e ag innse gum biodh bàs ann.
Bha fear Dòmhnall Mac a’ Phearsain às an Tulach am measg na feadhainn a thug cunntas air a’ Bhodach. Bhiodh e a’ coinneachadh ri caraidean air an Tulach a h-uile seachdain airson cairtean a chluich, agus drama no dhà a ghabhail.
Oidhche a bha seo, goirid ro mheadhan-oidhche, bha iad a’ cluich chairtean, ach cha robh uisge-beatha air fhàgail aca. B’ e Dòmhnall Mac a’ Phearsain am fear a b’ òige dhen chuideachd. Chaidh iarraidh air falbh gu bothan far am faigheadh e tuilleadh uisge-bheatha. Chaidh Dòmhnall ann, thog e na botail agus thill e don taigh far an robh a charaidean.
Bha an oidhche ciùin agus bha an iarmailt làn rionnagan. Cha robh lòchran aig Dòmhnall, ach bha e furasta gu leòr dha a shlighe fhaicinn. Ràinig e glac far an robh preasan aitinn a’ fàs. Chuala e fuaim coltach ri each a bha a’ feuchainn ri èirigh gu a chasan. An uair sin, chuala e nàdar de sgread mar gun robh an t-eagal air an each.
Thug Dòmhnall sùil mun chuairt ach cha robh sgeul air each no càil eile. Bha e dhen bheachd gun robh a charaidean ri cleas. Dh’èigh e nach robh dragh sam bith air. Ach cha robh duine eile ann. Thàinig an t-eagal air an duine òg agus lean e air gu sgiobalta. Ràinig e bad chraobhan-beithe leth-cheud slat bhon taigh far an robh a charaidean. An sin, chuala e sgreuch os a chionn anns na geugan. Bha e an dùil gun tigeadh a charaidean a-mach às an taigh nuair a chuala iad an sgreuch. Ach cha do nochd duine.
Chaidh Dòmhnall a-steach agus bha e follaiseach nach robh a charaidean air càil a chluinntinn. Cha do dh’inns e dad dhaibh.
Aig trì uairean sa mhadainn, thàinig an cèilidh gu ceann. Bha dachaigh Dhòmhnaill air rathad eadar-dhealaichte bho chàch. Bha e a’ coiseachd leis fhèin – mu chòig ceud slat air rathad a’ bhaile-fearainn agus trì cheud slat air an rathad phoblach. Gu h-obann, nochd rudeigin geal, solasach air a bheulaibh. Bha e coltach ri siota geal.
Cha robh Dòmhnall airson leantainn air a shlighe, ach cha robh e airson tilleadh don àite às an tàinig e na bu mhotha. Mar sin, dh’fhàg e an rathad agus choisich e dhachaigh thar an fhraoich. Agus chuala e an aon sgreuch eagallach a chuala e nuair a bha a’ faighinn an uisge-bheatha. A-nise, bha eagal a bheatha air. Ach dè rinn e? Innsidh mi dhuibh anns an ath Litir.
Faclan na Litreach<: /u> Loch a’ Ghartain: Loch Garten; Srath Spè: Strathspey; iolair-uisge: osprey; capall-coille: capercaillie; lòchran: lantern.
Abairtean na Litreach: Coit Ghartain, far am biodh daoine a’ dol a-null is a-nall thar Uisge Spè ann an coit: Boat of Garten, where people would go over and back across the River Spey in a small boat; le coille-ghiuthais ceithir-timcheall air: being surrounded by pine forest; bhathar ag ràdh aig aon àm gun robh creutair os-nàdarrach a’ fuireach: it was said at one time that there was a supernatural creature living; chluinneadh iad am Bodach a’ glaodhaich is a’ caoidh: they would hear the Bodach calling and wailing; Dòmhnall Mac a’ Phearsain às an Tulach: Donald MacPherson from Tulloch; agus drama no dhà a ghabhail: and to take a dram or two; oidhche a bha seo, goirid ro mheadhan-oidhche: one night, a little before midnight; b’ e Dòmhnall Mac a’ Phearsain am fear a b’ òige dhen chuideachd: X was the youngest of the company; bothan far am faigheadh e tuilleadh uisge-bheatha: a bothy where he would get more whisky; bha an iarmailt làn rionnagan: the heavens were full of stars; glac far an robh preasan aitinn a’ fàs: a hollow where juniper bushes were growing; fuaim coltach ri each a bha a’ feuchainn ri èirigh gu a chasan: a noise like a horse that was trying to get to its feet; gun robh a charaidean ri cleas: that his friends were playing a trick [on him]; bad chraobhan-beithe leth-cheud slat bhon taigh: a clump of birch trees fifty yards from the house; thàinig an cèilidh gu ceann: the gathering came to an end; air rathad eadar-dhealaichte bho chàch: on a different way from the others; còig ceud slat air rathad a’ bhaile-fearainn: five hundred yards on the farm road; nochd rudeigin geal, solasach air a bheulaibh: something white and luminous appeared in front of him; thar an fhraoich: across the heather (moor); an aon sgreuch eagallach: the same frightening scream.
Puing-chànain na Litreach: cha robh e airson tilleadh don àite às an tàinig e na bu mhotha : he didn’t want to return to the place he had come fromeither. This is the past tense form of nas motha which idiomatically stands for ‘either’ in this structure (only following a negative verb). Chan eil mise cinnteach nas motha ‘I’m not sure either’. Sometimes nas motha is also used in the past tense.
Gnàthas-cainnt na Litreach: bha eagal a bheatha air : he was frightened out of his wits.
Download the text of this week's letter as a PDF:Thoir a-nuas Litir mar PDF:
PDF documents are especially suited for printing out. Most computers can open PDF files, but if you have problems viewing them you may need to install reader software such as Tha faidhleachan PDF gu sònraichte math airson clò-bhualadh. Tha e furasta gu leòr do chuid de choimpiutairean faidhleachan PDF fhosgladh, ach ma tha trioblaid agad ‘s dòcha gum biodh e feumail bathar-bog mar Adobe Acrobat Reader. fhaighinn.
Litir do Luchd-ionnsachaidh
This letter corresponds to Tha an Litir seo a’ buntainn ri An Litir Bheag 739
Podcast
BBC offers this litir as a podcast: Visit the programme page for more info and to download or subscribe. Tha am BBC a’ tabhainn seo mar podcast. Tadhail air an duilleag-phrògraim airson barrachd fiosrachaidh no airson podcast fhaighinn