1320: Loch an Eich-uisge (2)
Litir sheachdaineach do luchd-ionnsachaidh le clàr-fuaime, tar-sgrìobhadh is mìneachadh. A weekly letter to Gaelic learners with audio, transcription and explanation.
Tha an litir ag obrachadh leis an fhaclair. Tagh an taba ‘teacsa Gàidhlig’ agus tagh facal sam bith san teacsa agus fosglaidh am faclair ann an taba ùr agus bidh mìneachadh den fhacal ann. The letter is integrated with the dictionary. Select the tab ‘Gaelic text’ and choose any word and the dictionary will open and you will see the English explanation of the Gaelic word.
Loch an Eich-uisge (2)
Tha loch ann an ceann a tuath Bharraigh, agus ’s e ‘Loch an Eich-uisge’ a chanas muinntir an àite ris. Chan eil mapaichean na Suirbhidh Òrdanais a’ toirt ainm sam bith dha. ’S e loch beag bìodach a th’ ann, don iar-thuath air Loch na Cuilce.
Chùm sàr-sgeulaiche Barrach dualchas an locha beò ann am beul-aithris an eilein. B’ esan Iain Mac a’ Phearsain no ‘An Codaidh’ mar a b’ fheàrr a dh’aithnicheadh e.
Chaidh an Codaidh a chlàradh ann an Gàidhlig ag innse sgeul Loch an Eich-uisge. Gheibhear cothrom èisteachd ris air làrach-lìn Thobar an Dualchais. Tha a’ Ghàidhlig aige brèagha, ach bidh e a’ bruidhinn gu luath luath. Ma tha e ro dhoirbh dhuibh a thuigsinn, tha cunntas aige ann am Beurla cuideachd anns an leabhar ‘Tales from Barra’. Co-dhiù, seo mo dhreach fhèin air an sgeul.
Bha boireannach a’ buachailleachd ri taobh Loch an Eich-uisge. Chunnaic i fear air bruach an locha. Bha e na chadal. Shaoil am boireannach nach fhaca i riamh fear cho brèagha ris. Chuir i a cheann na h-uchd agus thòisich i air fhalt a shlìobadh is a chìreadh. Bha camagan òr-bhuidhe aige a bha a’ dol sìos mu a chluasan.
Mhothaich am boireannach rudeigin annasach. Fillte ann am falt an duine, bha rathabhaich. Bidh cuid a’ gabhail ‘rabhann’ air. ’S e sin lus – car coltach ri feur –
a tha a’ fàs a-mhàin ann an uisge. Chuir sin an t-iongantas air a’ bhoireannach. Chuimhnich i gun robh a h-athair ’s a màthair agus feadhainn eile air innse dhi gun robh each-uisge a’ fuireach anns an loch.
Thòisich i air a ràdh rithe fhèin, ‘Math dh’fhaodte gur e an t-each-uisge a tha seo. ’S fheàrr dhomh teicheadh.’
Ge-tà, bha ceann an duine na h-uchd fhathast. Cha robh i airson a dhùsgadh. Mar sin, leig i a sgiorta dhith gu faiceallach, ga fàgail fhathast fo cheann an duine. Bha plaide tartain aice faisg air làimh. Chuir i sin oirre agus dh’fhalbh i dhachaigh na deann.
Nuair a dhùisg an duine, dh’atharraich e gu bhith air ais na riochd nàdarrach mar each. Bha e feargach nuair a chunnaic e gun robh am boireannach air falbh. Dh’èirich e agus le a chasan chuir e smùid às na creagan an sin. Chithear fhathast far an do rinn e sgrios air na creagan, gam bristeadh. Chan eil fhios dè thachair don each-uisge ach chan fhacas tuilleadh e ri taobh an locha sin.
Sin, ma-thà, an dàrna loch as aithne dhomh air a’ Ghàidhealtachd air a bheil ‘Loch an Eich-uisge’ mar ainm. Ach tha ainm-àite inntinneach anns an Eilean Sgitheanach. Air na mapaichean, ’s e Loch na Doireanach a th’ air an loch. Tha e ann an Slèite, anns a’ mhonadh eadar An t-Òrd agus An Teanga.
Chan eil e follaiseach sa mhionaid gu bheil ainm an locha ceangailte ri each-uisge, ach tha. A rèir muinntir an àite, ’s e Loch na Doireanaich a bu chòir a bhith air an loch. Tha e a’ tighinn bho Loch Doir’ an Eich ‘the loch of the grove of the horse’ – an t-ainm a bh’ air an loch air a’ chiad mhapa dheth a rinn an t-Suirbhidh Òrdanais. Bheir sinn sùil air an ainm agus air an sgeul an-ath-sheachdain.
Faclan na Litreach: beag bìodach: tiny; sàr-sgeulaiche: wonderful storyteller; Iain Mac a’ Phearsain: John MacPherson; a’ buachailleachd: herding livestock; plaide tartain: tartan plaid; Slèite: Sleat.
Abairtean na Litreach: ann an ceann a tuath Bharraigh: in the north of Barra; a chanas muinntir an àite ris: that the local people call it; mar a b’ fheàrr a dh’aithnicheadh e: as he was best known; tha a’ Ghàidhlig aige brèagha: his Gaelic is lovely; ma tha e ro dhoirbh dhuibh a thuigsinn: if it is too difficult for you to understand it; co-dhiù, seo mo dhreach fhèin air an sgeul: anyway, here is my own version of the story; shaoil am boireannach nach fhaca i riamh fear cho brèagha ris: the woman thought she had never seen a man as attractive as him; chuir i a cheann na h-uchd agus thòisich i air fhalt a shlìobadh is a chìreadh: she put his head on her lap and she started to stroke and comb his hair; bha camagan òr-bhuidhe aige a bha a’ dol sìos mu a chluasan: he had golden locks that went down around his ears; fillte ann am falt an duine, bha rathabhaich: entwined in the man’s hair was a water weed; a tha a’ fàs a-mhàin ann an uisge: that only grows in water; ’s fheàrr dhomh teicheadh: I’d better flee; cha robh i airson a dhùsgadh: she didn’t want to wake him; leig i a sgiorta dhith gu faiceallach: she took off her skirt carefully; dh’fhalbh i dhachaigh na deann: she ran home; dh’atharraich e gu bhith air ais na riochd nàdarrach mar each: he changed back into his natural form as a horse; le a chasan chuir e smùid às na creagan an sin: with his feet he smashed the rocks into smithereens; chan fhacas tuilleadh e: he was never seen again; anns a’ mhonadh eadar An t-Òrd agus An Teanga: in the hills between Ord and Teangue.
Puing-chànain na Litreach: bidh e a’ bruidhinn gu luath luath: he speaks extremely quickly. We can repeat adjectives to emphasise them e.g. bha e mòr mòr ‘it was very big’; tha mi cinnteach cinnteach ‘I’m absolutely certain’; bha sin luachmhor luachmhor ‘that was really valuable’. This can also work with the adjective in an adverbial situation e.g. Ò, gu cinnteach cinnteach! ‘Oh, absolutely certainly’; bhiodh e a’ bruidhinn gu slaodach slaodach ‘he would speak extremely slowly’; bha e a’ dealradh gu soilleir soilleir ‘it was shining very brightly’.
Gnàthas-cainnt na Litreach: Gheibhear cothrom èisteachd ris: an opportunity to listen to it will [can] be obtained.
Tha “Litir do Luchd-ionnsachaidh” air a maoineachadh le MG ALBA
Download the text of this week's letter as a PDF:Thoir a-nuas Litir mar PDF:
PDF documents are especially suited for printing out. Most computers can open PDF files, but if you have problems viewing them you may need to install reader software such as Tha faidhleachan PDF gu sònraichte math airson clò-bhualadh. Tha e furasta gu leòr do chuid de choimpiutairean faidhleachan PDF fhosgladh, ach ma tha trioblaid agad ‘s dòcha gum biodh e feumail bathar-bog mar Adobe Acrobat Reader. fhaighinn.
Litir do Luchd-ionnsachaidh
This letter corresponds to Tha an Litir seo a’ buntainn ri An Litir Bheag 1016
Podcast
BBC offers this litir as a podcast: Visit the programme page for more info and to download or subscribe. Tha am BBC a’ tabhainn seo mar podcast. Tadhail air an duilleag-phrògraim airson barrachd fiosrachaidh no airson podcast fhaighinn